#Alua Pasambahan 1 : Minta Izin atau Minta Pituah



A : Datuak Rajo Mantiko Alam…………………………………( Ambo) !

Imbauan tibo pado Datuak, sombah taserak ka nan rapek, salam kapado nan basamo, ambo ka mandatangkan sombah, sombah ka Datuak ditibokan ! Datuak nan tinggi tampak jauah, nan godang jolong basuwo. Kok tibo tompek batanyo, ka poi tampek ba burito. Lalu kapado Bundo kanduang, Bundo kanduang salendang duniah, limpapeh rumah nan godang, sumarak anjuang nan tinggi, pamenan mato urang nan banyak. Kahiasan dalam Nagari, Ka unduang-unduang kasarinah,-Kapayuang panji ka Akhirats, pambimbiang badan ka Sarugo.

Langkok sarato Rang mudo matah, Urang mudo pambimbiang duniah, urang nan arih bijak sano, alun dipanggiah inyo lah datang, alun disuruah inyo lah poi. Capek kaki ringan tangan, Capek kaki indak panaruang, ringan tangan indak pamacah. Parik dalam-paga nan kokoh, pamaga kampuang jo Nagari.Indak basisiah jo basibak, indak bahinggo jo babateh, dalam himbauan kasadonyo. Sombah disinan ditibokan. Adopun sombah nan kadipasombahkan tumbuah sarupo iko kini :

Sombah jo Titah dari muluik - Karangan Niniak Moyang kito.Nan takona kini ka kami Sabuik.Nan takilan kini ka dibaco. Alah ko patuik bona kadisabuik, alah ko buliah rundiang bamulo. Kok alah nan sado itu, Nan takilan ka kami baco, nan talipek ka kami kambang leba. Iyo nan Pituah dari Datuak !.


B. LAH SAMPAI DEK DATUAK !.....................( Lah sampai ) !


Kato nan datang dari Datuak, buni nan sampai kapado kami, itulah kato nan sabananyo, saketek indak nan salah sabarih indak nan cacek, lah iyo balako kasadonyo, lah iyo pulo janyo kami. Takilek camin diudaro, Pacah tatimpo si batu karang, Hilang disembah si ikan Rayo. Tibo lah sombah kapado ambo, lahiahnyo batuah ka ambo surang, Batin ka kami nan basamo. Kato biaso ba umpamo, rundiang biaso bamisalan.

Nan bak santano ayiah hiliah, tadayuak-dayuak di sarosah, olak jo olai turun tabiang, taserak-serai di  nan data, lamo jo lambek kasampai juwo ka Muaro. Sabalun sampai ka Muaro, sabalun tibo di lautan. Kok balayiah kan iyo banan kodo, kok bajalan iyo banan  tuwo. Dicaliak kiri jo kanan dipandang hiliah jo mudiak dek duduak lai baduwo jo batigo, duduak pun lai banan tuwo. Bona dirunuik sampai dapek, paham dicari jo baiyo. Samantaro kami baiyo jo batido, Tawakaf Kalam sakutiko, Sifat mananti malah Datuak !

                     Catatan ( Sombah di palega kan seperlunya ) !

MANGUMBALIKAN SOMBAH ( IZIN/PITUAH)

B. Maa lah Datuak Simuliah Nan Putiah ! …….        (ambo)!

Adopun Tawalak kato Datuak tadi, lah kami paiyo patidokan, lah kami paukuah pajangkokan. Mancari aiah nan janiah sarato sayak nan landai. Tagah dek baiyo jo batido lah tasuwo lalai jo talambek, sombah jo simpuah pamanuhi. Izin jo relah dari Datuak !

Barombak lawik sahilan, bakumpa karang katopi, ombak alun Duniah baguncang, galap gulito Bumi jo Langik. Tapi samantang bona baitu : Walau bak mano ragam nyo kato, walau bak mano macam nyo rundiang. Namun gondang wajib batingkah, Gayuang patuik basambuaik, juwo Kato wajib bajawab. Nak jaan taroncah di Nan asiang, nak jaan Takato dinan bukan. Insan nyato basifat Gawa – Allah Taala basifat Qadim. Nan Lia di angan-angan, nan jinak sajo nan kami Cakau. Ujuang pangabisan sajo nan kami ambiak !

Nan maalah nan jadi pangabisan kato Datuak tadi, kalau kami lai indak salah donga : Alah ko patuik Bona disabuik, alah ko buliah Rundiang bamulo ? Kok alah nan sado itu, nan talipek ka kami kombang leba. Iyo nak Pituah dari Datuak ! Kan baitu kato Datuak?! ( Bona )

Indak lai Tuak ! Nan kajadi taguah jo saponyo dek kami sakorek sabalah kaniak : Paek lah tibo dalam Barih, Ukuah lah tibo di Kabuangan. Lah luruih Datuak manyabuik. Dimuko Niniak jo Mamak sarato urang nan banyak. Utang di kami mambanakan. Baitu pulo nan kasaponyo.

A. Lah sampai dek Datuak !....................( Lah sampai )!  


Mandongan jawaban dari Datuak, sonang lah bona dalam hati sajuak didalam kiro-kiro. Baalah bona sonang nyo hati, Dek tukang nan indak tagambarkan, Dek Malin indak Tabacokan. Jarang lah urang nan katahu, Hanyolah  ALLAH jo Malaikat. Raso manetek aka lundang, raso basiram si aiah rimbo. Dek didatangkan Salam dipuhun kan Sombah, kan iyo dek mananti kato Datuak nan sado itu. Kini Datuak lah manarimo, sakali elok dek Datuak, sapuluah baiak dek kami. Alhamdulillah nan kasapo nyo.             

 (Samo-samo Tuak !


Catatan : A = Pihak 1
                B = Pihak 2

 
Baca Juga :  #Alua Pasambahan 2 : Manduduakan Mamak

 
Ditulis Oleh : Maswirman Dt.Marajo Nan Hitam

Berlangganan update artikel terbaru via email:

0 Response to "#Alua Pasambahan 1 : Minta Izin atau Minta Pituah"

Post a Comment

Iklan Atas Artikel

Iklan Tengah Artikel 1

Iklan Tengah Artikel 2

Iklan Bawah Artikel