#Alua Pasambahan 2 : Manduduakan Mamak




 A. Datuak Rajo Nanso……………………………………..(ambo)!

Diangkek sombah jo salam, disusun jari nan sapuluah. Ditakuah kan kapalo ka nan satu, Tahunjam lutuik ka bumi. Ambo ka mandatang kan Sombah !. Adopun sombah nan kadipasombahkan adok ka diri Badan Datuak baiak kapado nan basamo, Tumbuah sarupo iko kini :

Hari ditakuak ditunaikan, janji Dilabuang ka dikarang, Banamo Alek Simarapolai. Nan bapakai japuik jo antah-tasambiah arak dengan iriang. Tuah japuik nyato Tabawo, tuak Antah nyato lah tibo. Tuah Arak sapanjang jalan, tuah Iriang sapanjang Labuah. Arak iriang sapanjang jalan, badombai sapanjang labuah. Lah banyak Korong talampau, lah banyak Dusun talewati. Lareh Taratak tak disabuik, Dusun Nagori tak di baco. Jalan nan pasa lah baturuik, labuah nan golong lah batampuah. Jalan Rayo titian batu, paga hiduik baliak batimba. Pudiang Ameh sabalah luah, pudiang hitam sabalah dalam, Linjuang tumbuah sabatang, salo manyalo si daun Pandan.

Jalan sarontang duwo rontang, cukuik katigo rontang panjang, dek jauah basarang ampiang, dek ampiang kini lah tibo. Tibo di Korong kampuang  Datuak ! Lah batando kampuang ko ampiang, lah Tadonga bunyi-bunyian, sorak jo sorai jadi tapuang, Aguang talempong jadi bungo, togak Marawa sibungo Adat, salatuai badiah pusako. Baguguah tabuah larangan, larangan Panghulu di Nagori. Lah takajuaik nak rang si Bunian, Tasentak Maik dalam Kubuah. Nyo sangko Duniah ka Kiamat, kironyo Urang siko mangambang Duniah untuak malapeh kan Niat jo Nazar.

Lah datang Datuak kasiko, datang sarato jo rombongan, satibo Datuak disiko, lalu mambelok kahilaman, lah maawah cando kanaiak, lah bagantuang ditupang pintu. Lalu ditingkek tango nan limo, lah lalu ka Ruang tongah, duduak di palangko Gadiang dibawah tirai si Ujun-ujun. Tanggolah adat pek nan kini, alah banamo Niat sampai-alah batando Kauah salamat. Bungo marajam tiok tangkai kulik basandu jo Suaso. Ameh baiak panahan Jarum, Tasabuik kato nan duwo. Nan maalah kato nan duwo; Kato Adat Kato Pusako, kato pusako maliputi. Partamo Adat Tabatu Intan, Kaduwo Syarak Taujudullah. Dalam Adat Tabatu intan Tigo lah Rukun didalamnyo. Partamo sombah-manyobah, kaduwo Siriah jo Pinang, katigo Baso jo Basi. Dalam Syarak Taujudullah Duwo lah Rukun didalam nyo ;

Partamo Togak nan Babandiang, Kaduwo Duduak nan Babanja. Dalam Togak nan Babandiang, dalam Duduak nan Babanja. Kok kurang Ibak bak di kilang, kurang sikek bak disigo, kurang sasuai bak tuangan. Aluah di ateh kok ka bawah, patuik di Ujuang kok di  Pangka. Nan Godang kok kurang Ambak, nan tinggi kok kurang anjuang, Nan  T uwo kok indak tamuliah kan. Sombah jo Simpuah pamanuhi. Izin jo Relah dari Datuak  !

Itunyo sombah Salam kami lorong ka diri badan Datuak, baiak kapado nan basamo. Tinggi Gunuang – Basa Harapan. Kato diharap di tarimo. Dimintak buni Nak kumbali.

JAWABAN SI ALEK JAMU

B. Lah sampai dek Datuak !...............................( Lah sampai ) !


Gorak jo Gorik dari Allah, Titah nan datang dari Nobi. Sombah nan datang dari Datuak, Salam nan sampai kapado kami. Itulah kato nan sabonanyo, lah iyo pulo janyo kami. Namun baato tulai kini : Mandonga imbauan dari Datuak, kok buliah rundiang dimisakan, Nan bak Kukuak Ayam sadang haniang, Bak mandonga si Bilal Abang, wakatu subuah nan lah tibo. Tasintak insan dalam tiduah, Umat pun jago kasadonyo.

Santano iyo bona nan baitu : Aluran diri badan amboko. Nan bak ibarat sampan tuwo, kalangkapan indak lai cukuik, laiah cabiak pandayuang patah, lantai lah hanyuik ciek-ciek. Namuah bona ambo balayiah, sialah urang nan kamanumpang, mungkin kahanyuik sajo dimuaro.
Tapi samantang bona baitu, Dek Cinto ka Pulau nan lah lamo, angan katapian sajak dulu. Walau kahanyuik di Lautan, walau ka mamakai pandayuang patah, Namun Nan Pulau ka ambo jalang juwo. Sabalun sampai badan kapulau, malakik tibo di tapian, dek kami lai duduak baduwo jo batigo. Di ukuah kato agak sapatah, Bana dirunuik sampai dapek. Rago mancari kabulatan. Sobah Relah malah Datuak, suko mananti sakutiko. Baitu pulo nan kasaponyo.

Catatan : Sombah dipalegakan sesama kawan (Seperlunya). Lalu sombah dikumbalikan setelah didapat kesepakan bersama.


B. MAALAH DATUAK BIJO NAN BALANJUANG…………..(Ambo) !

Adopun tawalak kato Datuak tadi, nyato lah talalai lah talambek dek kami mampaiyo mampatidokan, dek mancarti bulek nak sagolong, mancari picak nak salayang. Sombah jo Simpuah pamanuhi, Izin jo Relah dari Datuak!

Barombak lawik sahilan bakumpa karang katapi, ombak alun-duniah baguncang, galap gulito Bumi jo Langik. Tapi samantang iyo bona nan baitu. Walau bak mano pandongaran, nan gondang wajib batingka, kok gayuang patuik disambuik, juwo kato wajib bajawab.Nan ambacang ditongah padang. Babuah babungo lobek. Dalam babuah babungo pulo. Kalau dirontang namuah panjang. Elok dikumpa nak nyo singkek. Singkek Sakiro kapaguno. Elok nan lia diangan-angan, nan jinak sajo nan kami cakau, ujuang pangabisan kato Datuak nan kami ambiak. Maalah nan jadi ujuang pangabisan kato Datuak tadi kalau kami lai indak salah donga :

Dalam togak nan Babandiang, walau pun Duduak nan Babanja ; Kok kurang Ibak bak dikilang, kurang sikek bak disigo, kurang sasuai bak tuangan. Aluak di ateh kok kabawah, patuik di ujuang kok ka Pangka, Nan godang kok kurang ambak, nan tinggi kok kurang anjuang. Sombah Jo Simpuah Pamanuhi, Izin jo Relah dari Datuak !, Kan baitu kato Datuak ?
 (Bona)

Indak lai Tuak ! Nan kajadi taguah jo saponyo dek kami sakorek sabalah dari sinyak ; Ditiliak dikonang-konang, diajun dalam kiro-kiro. Manuruik tiliak pandangan kami, tumbuah sarupo iko kini ;

Paek lah tibo dalam Barih, Ukuah lah tibo di kabuangan. Lah Elok ditimpo Baiak, lah lamak ditimpo manih. Lazat cito jikok diminum, Sadap gumarau jikok dimakan,  Lah bak mandi di anak sungai, lah bak bapayuang batuduang awan, raso dikipeh angin Sarugo. Sonanglah hati pek nan kini, sajuak anggoto katujuah nyo.

Lembak nan dari pado itu. Dek panggang biaso babaliak, dek kato biaso kumbali. Taradok pulo koma ka kami nan mandatang. Sarantak langkah dinan data manuju ronah kampuang nagko. Kampuang nan endah katinggian bapaga bukik barisan, salo manyalo gunuang nan tigo, tungku nan tigo sajorangan. Di bukik bonda baliku. Ladang bapetak pek nan lereng, sawah bajanjang dinan data, tando nyo Dusun tumpak batumpak.Parik nan panjanhg lah kami turuik, labuah nan golong lah kami tampuah. Mulo tabayang kampuang nangko, sonang hati bukan kupalang. Lalu diansuah jowo bagulambek, kini lah tibo kami di kampuang Datuak. Satibonyo kami disiko, sabanta kami dihalaman kami lah dibawo naiak. Kok naiak lah basingkok kan pintu, duduak alah babantangkan lapiak. Sonanglah bona dalam hati sajuak didalam kiro-kiro. Lembak nan dari pado itu. Kami dek bacampuah Tuwo jo Mudo, Godang ketek samo tabawo.   

Kurena nyato tiok Badan, Parongai balain tiok kapalo. Kok tasingguang Mamak dek ka Naiak, kok tagisiah Datuak dek ka duduak, Ma,af dimintak banyak-banyak, Izin jo relah dari Datuak! Nak Sonang pulo hati kami nan mandating, Nak sajuak pikiran Ibu jo Bapo. Kato sapatah nan kami nanti, Rundiang sabuah nan kami tunggu. Jawah Sugiro mintak Baleh. Baitu pulo nan kasapo nyo !.

A. LAH SAMPAI DEK DATUAK ?!.........................( Lah sampai ) !


Tabik pangona pihak dek Datuak, tumbuah sarupo iko kini : Kami dek bacampuah tuwo jo mudo, godang ketek samo tabawo. Dek Kurena tiok Badan, Parongai balain tiok kapalo. Kok tasingguang Mamak dek kanaiak, kok tagisiah datuak dek kaduduak, Ma,af dimintak banyak-banyak, izin jo relah dari Datuak ! Nak sonang hati kami nan mandatang, sajuak pikiran Ibu Bapo. Kato sapatah nan bananti rundiang sabuah nan batunggu, jawab sugiro mintak baleh ! . Kanbaitu KatoDatuak ?
 (Bona)!

Nan kajadi toguah jo saponyo dek kami sakorek sabalah kaniak, donga dek Datuak kami handaikan : Mulo nyo sumuah kadi kali, takalo rantiang kadipatah. Alah ta Niat didalam Hati, dipikiran pun alah tagamba. Kok ado Kilaf jo Kilafat, kok ado salah jo Gawa, ataupun Silik jo Binaso. Samo-samo kito sarahkan sajo kapado Allah. Alhamdulilah sajo nan kasapo nyo.        ( samo-samo Mak Datuak )!.


Baca Juga : #Alua Pasambahan 1 : Minta Izin atau Minta Pituah

Baca Juga : #Alua Pasambahan 3: Pasambahan Siriah Jo Pinang
Ditulis Oleh : Maswirman Dt.Marajo Nan Hitam

Berlangganan update artikel terbaru via email:

0 Response to "#Alua Pasambahan 2 : Manduduakan Mamak"

Post a Comment

Iklan Atas Artikel

Iklan Tengah Artikel 1

Iklan Tengah Artikel 2

Iklan Bawah Artikel