Alua Pasambahan 4: Jawaban Siriah Jo Pinang


JAWABAN SIRIAH / PINANG

B. MAALAH DATUAK GINDO SAIK !...........................( Ambo)!


Adopun tawalak kato Datuak tadi, lah kami paiyo patidokan,lah kami paukuah pajangko kan. Tumah lah Datuak liyek Datuak pandangi, lah ditatiang kan ka Niniak Mamak lah dipaiyokan samo panghulu. Bulek lah aiah ka pambuluah, bulek lah kato ka mupakat. Dek mupakat kami sakorek sabalah kaniak. Nan kamanjawab kato Datuak, iyo nak dari ambo juwo.


Izinkan ambo manitih batang papah dek Datuak jo bicaro, ambo nan indak tahu pandai. Kurang paham tarabo-rabo, indak ilimu suluah kok Padam, elok lah kito paralukan. Kok buliah Rundiang di misalkan. Nan bak ibarat Sapu tangan, nan bakilin suduik katopi, barendo sulam katongah, ragi sarupo baliak batimba. Batatah jo banang suto, Basulam jo bonang ameh. Laweh nan indak loweh bona dapek panahan hujan ketek, dapek pahapuih paluah dihari paneh, jikok dilipek hanyo Sagangam. Kok Harago pun indak maha bona, dapek diboli dimano sajo. Tapi.. godang Arati jo Ma’ana nyo. Dapek pauleh suri nan tagantuang, buliah kajadi Ukiran kain Sudah. Basulam Rendo katongah – Bakilin suduik katopi, Kilin nan indak ka di ulang, jajak pun indak ka di tikam.


Di ulang kilin kok sipi, ditikam jojak kok cupu, dititi batang kok batimbang, gamang dirintiak ka batuka, takuik di ragi ka batimbang. Sadang dirintang nan baitu, sadang dimabuak nan bak kian, Tabayang pitatah jo patitih, gurindam caro luak limo puluah kini tasabuik-sabuik juwo : Tambilang baulu sapek, Nan tasisik diateh lantai. Ambo bilang sado nan dapek, Nan tingga pulang juwo ka nan pandai. Nan Lia diangan-angan, nan jinak sajo nan kami cakau. Ujuang pangabisan sajo nan kami ambiak ;


Maalah nan jadi ujuang  Pangabisan kato Datuak tadi kalau kami laii indak salah donga ;  Aluran Carano nan ditongah nan barisi Siriah jo Pinang, sarato Rokok nan sabatang, sarato sodah jo gambiah ado disinan. Nan pintak pinto dek Datuak !   Siriah sakapuah pintak dikunyah, pinang sadidih mintak digatok, sambiah kan Rokok nan sabatang ! Kan Baitu kato Datuak ! (Bona) .  Tumbuah sarupo iko kini, nan kajadi taguah jo saponyo dek kami sabalah kaniak, simak dek Datuak kami curah kan : 00ohh Datuak simak lah rundiang, rang siko donga lah baa. Rundiang kalalu jo Kiasan, kato kalalu basintina. Kok Mudo rundiang dalam Adat, asah mauleh indak babuku, asah mambuhuah indak mangasan. Indak mancacek jo binaso, lah biaso juwo dalam Adat kito.


Lah manjantang kabuik digunuang, lah tampak gabak dihulu, kiro nyo awan manganduang hujan. Angin batiup kiri jo kanan, kilek tapajam ciek-ciek, Guruah sadantuang mangiringi. Niatan hujan lah nak turun, lapeh di awan nan bajumpo, cucuah di kabuik nan bagalap. Cucuah nan bukan alang-alang, lah bak maniak putuih talinyo, lah bak intan putuih pangarang, suko tinaman kasadonyo, Bataruak pucuak sadang mudo. Santano lah titiak dari Ateh, sifatan Bumi manarimo. Maklum lah Datuak tantang itu. Baitu pulo nan kasaponyo.-


A. LAH SAMPAI DEK DATUAK !...........................( Lah sampai )!


Mandonga jawaban dari Datuak, Ya Allah sonangnyo hati, sajuak didalam kiro-kiro. Baalah bona sonang nyo hati.                        

Dek tukang nan indak taganbarkan, dek Malin nan indak tabacokan. Jarang lah urang nan katahu, hanyolah Allah jo Malaikat. Dek didatang kan salam dipuhunkan sombah kan iyo dek mananti kato Datuak nan sado itu. Kini Datuak alah manarimo, sakali elok dek Datuak, Sapuluah Baik dek kami. Al - hamdulillah sajo nan kasapo nyo.

                     ( Samo-samo Al-Hamdulillah Mak Datuak ) !

AL – HAMDULILLAaHI RABBIL A’ALAMIIN


Baca Juga : #Alua Pasambahan 3 : Pasambahan Siriah Jo Pinang
Baca Juga : #Alua Pasambahan 5: Pasambahan Makan Jo Minum

Penulis : Maswirman Dt. Marajo Nan Hitam

Berlangganan update artikel terbaru via email: