Monday, April 15, 2019

#Alua Pasambahan 5: Pasambahan Makan Jo Minum

Pasambahan Makan Jo Minum Adat Minangkabau


A. DATUAK MARAJO NAN HITAM……………………………(Ambo) !

Tagah dek imbau nan sakali, tagah dek rundiang nan sapatah, dek aluah patuik baturuik tajambo salam sampai kini. Tagah dek buek nan bakarang, nyato dek janji ba ikati kini lah samo dikunjungi. Hukum putuik tampek bagantuang, kato sudah tampek ba pogang, Kato sabuah tampek diam. Lorong di kami nan basamo, iyolah Niniak dengan Mamak, sarato Ibu jo Bapo, adok ka diri badan Datuak baiak kapado nan basamo. Angan-angan sapanjang hari, cinto tak putuih nan mandatang. Angan nan sajak mulo dulu, cinto nan sajak mulo saisuak, lah tasabuik dibuah renai – lah tabincang dibuah rundiang, kini lah baru Dinyato kan.

Nan bak santano hujan lobek, cucuah nan bukan alang-alang, lah bak maniak putuih tali, nan bak Intan putuih pangarang, Bak gunuang putaran angin, bak Bumi di hoyak Gampo. Hulu muaro daulunyo kini lah pasiah pangiraian. Dek tahun musim baganti dek zaman raliah baraliah, muluik manih calempong kato, Baso Baik Budi Pikatan. Kapahubuag Silatur Rahim.

Talayang sampan katongah,babalun-balun jo Buiah, ombak mamacah kiri jo kanan, galombang manulak jauah , riak mambawo katopi, sampan Babalun dalam itu.Santano iyo lah bak itu; Tantangan Juadah nan ditongah, lah basusun di ruang tongah, alah baririk diruang topi, Sajalan cawan jo pinggan, sadundun Galeh jo Baki, sakato piriang manuruti, samo barisi kasadonyo, Banamo Ragam si Bungo Alek.

Alah tadonga piriang babuni, eten didalam pandapuran lalu ditatiang ka Ruang tongah. Teko godang mamacah ruang, cangkiah ketek babilang jari, jawek-bajawek candonyo Piriang, kini tahunjuak ka muko Datuak. Ditongah awang gumawang, ditopi samuik baririang, Nago bahoyak kiri jo kanan. Dek Urang mudo mambagikan, kok kurang ingek mangamudi, jarang kok rapek kok basuwo, labiah jo kurang kok batamu. Sombah jo simpuah pamanuhi, Izin jo relah dari Datuak.
Namun baato tulai kini, Nak nyo sonang hati rang disiko, nak sajuak pikiran ibu jo bapo ; Pandang jauah tolong layangkan, pandang dokek tolong tukiak kan, pandanglah Juadah jo Hidangan. Kok lai kurang nan kakami tambah. Umpang kok lain nan kakami sisik, labiah nan indak ka kami ambiak. Kok batamu nan bak kian, kok basuwo nan baitu. Kato sapatah nan kami nanti, rundiang sabuah nan kami tunggu. Kato diharap Datuak tarimo, dimintak buni nak Kumbali. Sakian sajo panyombahan.!


B. LAH SAMPAI DEK DATUAK ?!...........................(Lah sampai ) !

Nan sapanjang kato Datuak tadi, buni nan sampai kapado kami itulah kato nan sabonanyo, lah iyo pulo janyo kami. Baru Tadonga imbauan dari Datuak,; Tabayang pitawek-pituh Guru nan Batigo; Partamo Angku Sari Alam, nan dipintu lawang langik, Nan kaduwo Nago Malintang, nan tabayang di Udaro, Nan Katigo, Adin Tumadin, nan kiramat Mokah Madinah, kiramat nyo lalu sampai kini.
Aluran sombah salam Datuak tadi; Kok Balabeh lah Manahan cubo, luruih lah barantangi bonang, bantuak dimakan siku-siku. Bungka gonok Manahan asah, hukum adiah Manahan uji, kato bona Manahan bandiang. Bona tak dapek ditukari. Namun baato tulai kini; Nak nyo Janiah bak dibasuah, nak nyo toreh bak ditompi, sahiah kaguguah dari tampuak, nyato ka lokang dari kulik.
Dek kami duduak lai baduwo jo batigo, diukuah kato agak sapatah, Rundiang dibawo jo baiyo, Bona dicari sampai dapek. Samantaro kami baiyo jo batido, tawakaf kalam sakutiko, soba relah malah Datuak, suko mananti sakutiko.


A. LAH SAMPAI DEK DATUAK ?!........................( Lah samapai ) ! 

Dek Adat itu basuruah, dek Syarak baitu pulo. Baolah Baiyo jo batido. Nak kami pakai sifat mananti. Sugiro juo malah Datuak !. Baitu pulo nan kasapo nyo.-


MALIYEK JUADAH/HIDANGAN

B. Maalah Datuak !.................(Ambo)! 

Adopun tawalak kato Datuak tadi, nyato lah talalai lah talambek dek kami mampaiyo mampatidokan, ampun jo ma’af kami mintak, izin jo relah dari Datuak ! ( Kapado Allah Mak Datuak )! Nan bak santano Urang Batanun ; Dirontang bonang jo suto, bari barintiak bacukiah ragi, Ragi elok bonag salosai samo mancinto jadi kain. Kain baguntiang lah bajaik, baju lah sudah disaruang kan. Indak kadi ulang kilin, indak kaditikan jajak. Diulang kilin kok sipi, ditikam jajak kok cupu, dititi batang kok batimbang, Takuik di ragi kabatimbang, ragu dirintiak ka batuka.

Sadang dirintang nan baitu, sadang dimabuak nan bak kian. Datang pitunjuk dari Allah, tibo tolongan dari Nobi. Tabayang pitatah jo patitih, Gurindam Caro Limo Puluah, kini tasabuik-sabuik juwo, Satinggi-tinggi malantiang, lah tasasiak ka awan biru, suruiknyo katanah nagko lah juwo, sajauah-jauah marantau, lopeh ka Arab jo ka Masiah, Irak jo Iran tak dibaco, suruiknyo ka kampuang nagko lah juwo. Sabanyak kato nan tasabuik ujuang pangabisan sajo nan kami ambiak. Nan maalah ujuang pangabisan kato Datuak tadi kalau kami lai indak salah donga : Aluran Juadah nan ditongah Caliak-caliak lah dek Datuak, pandanglah Juadah jo Hidangan , Kok lai kurang nan ka kami tambah, umpang kok lai nan ka kami sisik, labiah nan indak ka kami ambiak ! Kan baitu kato Datuak!
( Bona )

Ditiliak dikonang-konang, di ajun dalam kiro-kiro, pandang jauah lah kami layangkan, pandang dokek pun lah kami tukiak kan, tagerek pandang arah katongah,tampaklah Juadah jo Hidangan. Manuruik tiliak pandangan kami, Alah lah boneh nan bak padi satangkai, lah bulek nan bak ampacang ciek, kok aluih lah bak dindiang camin, data lah bak lantai batu. Sonang lah hati mamandangi.

Ontah kok sakorek dek kami sabalah kaniak, sabalah kakiun Datuak lah nan ka tahu. Baa ka elok ka baiak nyo bona dianta sampai kabakeh Datuak. Baitu pulo nan kasaponyo.



A. Lah sampai dek Datuak ?!..............................( Lah sampai )!

Alah lah Boneh nan bak padi satangkai, lah bulek nan bak ambacang ciek ! Baa kaelok ka baiaknyo Bona dianta sampai ka bakeh Datuak ! Kan baitu kato Datuak !?
( Bona )

Dek kami kan iyo kato sapatahtu nan bananti, rundiang sabuah nan batunggu, kini Datuak alah la manarimo, sonanglah bona dalam hati, sajuak didalam kiro-kiro. Namun baato tulai kini, Nak joleh Niat ko sampai, nak asoh kauah salamat.

Nak jaan dimabuak iko juwo. Nan pintak pinto dek kami adok kadiri badan Datuak, baiak kapado nan basamo. Aiah dingin Pambasuah tangan, aiah angek palapeh Awih, Hidangan nak samo kito santap. Dipanggiah Datuak Mangkudun, Manjawab Datuak Katumangguangan. Aiah talotak mintak diminum. Nasi tahidang mintak di Makan. Sakian sajo panyombahan, kato diharap ditarimo, dimintak buni nak kumbali !


B. LAH SASMPAI DEK DATUAK !............( Lah sampai )

Aiah talatak mintak diminum, Nasi tahidang mintak di Makan ! Kan baitu kato Datuak ?!
(Bona)
Nan kajadi toguah jo saponyo dek kami sakorek dari sabalah kaniak. Nan Bak santano urang ba biduak, Biduak ameh Pandayuang perak, Lantai intan-layiah suaso, Nangkodo Rang bijak tahu pandai, Ari di angin nan basiwik, tahu di ombak,nan basabuang, pandai manjago pasang turun naiak, Angin tonang Ombak salosai disinan Biduak kito layiah kan.

Nak jaleh Niat ko sampai, nak osah kauah salamat, nak jaan dimabuak iko juwo ; Duduak lah Datuak di Kamudi, kami nak togak di Haluan, Biduak Nak samo kito Layiah kan. Nan bagantuang ditali taguah, samo bapilin kaduwonyo. Walau pun kami nan Datuak Suruah, Datuak Nak samo santap pulo.


A. LAH SAMPAI DEK DATUAK ?!........................( Lah sampai )!

Walau pun kami nan Datuak suruah, Datuak nak samo santap pulo ! Kan baitu kato Datuak ?
(Bona)
Nan kajadi taguah jo saponyo dek kami sakorek sabalah kaniak, donga dek Datuak nak kami handaikan :

Limbago Jalan Batompuah.
Itu Pusako Niniak Mamak.
Sadang mambuwek kami lai Namuah.
Kununlah Mamakan Nasi nan lah Ado.

Kini baitu lah dek Datuak ! Nak tahu jo Pakan Rabaa. Turuik lah Jalan ka Pakan Sinayan. Basimpang jalan ka Padang Balimbiang. Kami Mulai jo Bismillah. Iringi dek Datuak jo Basuah Tangan. Sudah makan kito Barundiang.

BISMILLAHIR RAHMAANIR RAHIM.

Baca Juga : #Alua Pasambahan 4: Jawaban Siriah Jo Pinang

Penulis : Maswirman Dt. Marajo Nan Hitam 

No comments:

Post a Comment